VITA ‘na vota

Dettagli

Pubblicato Giovedì, 21 Giugno 2012 13:08

Scritto da Francesco Buffa

Visite: 2060

Vitalori! La facemu ‘na bella ricurdata?

All’Acquanova un si fa chiù l’abbivirata,

ma la funtana ancora vìrila putemu

si ‘na longa caminata ni facemu.

Vicinu lu Bagghiu la Matrici ‘na vota c’era

iemuci tutti ‘nsemmula a diri forti ‘na priera,

doppu lu terremotu accarunu la fici spirìri

ma nta lu cori nostru sempri l’amu avìri.

La rificiru bedda la chiesa Priatoriu

ma è sempri chiusa, pari un mortoriu,

nun sonanu chiù li soi campani

chi signavanu l’uri a li paisani.

‘Na manciata iemu a fari au voscu Barunia,

doppu aduramu la Madonna di Tagghiavia.

Turnannu, a S.Franciscu avemu a tràsiri,

quannu niscemu u Municipiu putemu vìriri.

Na passiata nta lu Stratuni putemu fari

ma nun ci truvamu chiù putii e i tabaccari

Ciru Galifi, Nardinu Agueci, Nzulu Caputu;

quantu beddi cosi cj avemu accattatu!

Lu bar di Libroniu e di s’o patri l’osteria

restano nta lu ricordu cu’ tanta nostalgia,

bar Befurcu un c’è chiù a lat’u carnizzeri

quannu facia a manu li graniti pari aèri;

u cafè però pigghiari ni Pirricuni putemu

o ni Angila o ni Lotta trasemu e lu vivemu.

Ddà vicinu c’è di Caputu la nova farmacia

ma speriamo che bisognu ‘un ci ni sia

U Circulu di li Mastri ‘dda un c’è chiù

chiddu di l’Agricoltori e l’autri un ci su’

dunni stava Paulu l’acqualoru unu ni resta

ricorda chiacchiariati e jucati di la festa.

Lu panificiu di Messina un c’è dunn’era,

ni Corrao chiù nun si ferma la corriera

tutti li iorna eu aspittava a tremacori

chi mi purtassi la littra du me’ amori.

Nfacci la casa di me’ patri, ricordi amari,

un ci su chiù fimmini a ghinchiri quartari;

l’aciddittu chi prima curria è ora fermu

lu salutava eu quannu mi n’ ia a Palermu,

e a Palermu quacchi vota eu ci ia

supra lu camiu di Sanfilippu Antria,

era chinu di ova, tumazzi e ricotta

ch’ arrivannu vinnia a prima botta;

eu curria a la pensioni d’u signor Giglio

chi mi vulia veru beni comu a un figlio;

ia a studiari e puru rivìriri la mè bedda zita

chi da sessantanni accumpagna la me’ vita.

A malincori finisciu cca ‘sta storia antica

dicennu a tutti Arrivederci, Assabbinirica!

Francesco Buffa

Tweet

Share